Starry Night (已結業)

公司同事萬聖節攪咗個活動，就係齊齊去食生蠔放題，Starry Night餐廳酒吧萬聖節佈置得好有氣氛，現場有玩有食。每人一個生蠔任食套餐。入座後即送上餐湯、煙三文魚、黑糖麵包。雞肉忌廉湯順滑濃稠，啖啖湯都食到雞肉。黑糖麵包美味鬆軟，點些忌廉醬味道更佳。煙三文魚砌成一朵花，色澤鮮艷美麗，魚肉帶濃濃煙熏香，鮮甜美味。跟住就係食生蠔，侍應首先做咗煙霧效果，再放上一大盆生蠔，仙境一樣，煙霧散得好快，記得打咭要快手啲！生蠔品種供應係跟時令，今日有韓國和愛爾蘭蠔。還有新鮮彈牙嘅凍蝦和翡翠螺。韓國蠔：蠔肉厚身好肥美，蠔身綿滑， 鮮甜並帶點海水味。愛爾蘭蠔：海水味濃，蠔味鮮甜，肉質爽口。主菜三選一，（有美國西冷牛扒/紐西蘭羊架/卡邦尼意粉），卡邦尼意粉濃厚香滑，麵煮得剛好，有嚼口及彈牙，Creamy的汁香濃得來不膩。Cinderella：呢款咁精緻嘅雞尾酒係由多種生果調教出來，味道清新，飲落酸酸甜甜，果味十足。