東記上海麵

營業中

休息中

呢度嘅邪惡豬扒同雞翼， 久唔久就掛住佢 。上一次係幾個月前來食過， 今日再食都唔過份喇。東記喺新街市二樓 ，之所以叫做新街市， 係因為以前有個臨時咗N年嘅臨時街市， 新市政大樓起好，街坊都叫佢做新街市。佢地係臨時街市果陣我已經食過，不過唔記得咗係東記定世記(兄弟幫)。搬咗入嚟新街市， 東記有地勢之優， 上咗escalator 行入去過幾間就係。世記再要行入幾間。 我通常都會喺呢度食， 今日照舊嗌咗豬扒粗麵 ，叫咗先記得呢度啲粗麵勁淋， 但係次次都口快快叫咗，其實想試下米線或者米粉。平日兩點零鐘， 唔使等位 ，炸豬扒即叫炸，等咗十分鐘左右， 有得食喇。豬扒切開大概六件， 分開上，唔會浸係湯麵度淋哂。豬扒保持水準， 炸得好香，肉質夠鬆軟 ，又惹味， 啖啖肉 ，好邪惡。啲麵講咗喇 ，一咁淋， 啲湯都平平無奇， 喺呢度真係食炸豬扒同埋炸雞翼呢度冇嘢飲叫， 如果想飲，就要喺隔離茶檔叫過嚟啦。記得上次星期六嚟， 好彩揾咗一陣就有位 。但係跟住個豬扒同雞翼麵要等成30分鐘以上， 如果假日去食， 就預咗等咁耐喇。