板長壽司 (已結業)

師兄返咗黎香港，好耐無聚，佢想回味下日本菜。其實近排成日食，有啲厭，但都捨命陪君子。黎到板長門口先見到有放題，而我竟然從來都無留意過！！。。。可能平時少食呢間😂本身諗住單嗌即刻轉咗，決定一戰放題。八點鐘去到大概有七八枱在等，入到去人未算多。話不多說落單先！總共八張menu，選擇都幾豐富。先寫咗幾樣小菜頂住先，汁炒鴨舌必點！比想像中好食好多，蒜苔甜脆，鴨舌爽口。連不食鴨舌的朋友都食多兩啖。人氣小菜螺肉同鳳爪都幾好食，開胃。刺身就中規中矩，三文魚同帶子肉質鮮美，但甜蝦有少少腥。推薦香芒吉列蝦卷，芒果肉大大片cover係面上，非常吸引！果肉甜，配炸蝦卷真係一流，一人兩件都未够。甜品得三樣，但三樣都好食。紅豆奶凍奶味足，紅豆甜。抹茶和果子軟Q彈牙，好食。上菜速度好快，一眨眼滿枱食物。可惜飲品得茶？有啲單調。放題218得一個半鐘，認真幾貴下，不過食物質素都算係對得起呢個價。