十二味貴陽牛肉粉 (已結業)

趁住天氣轉冷，好想食啲辣嘢暖暖身，等自己精神啲，咁啱見到公司附近有間貴陽牛肉粉專門店開張，即刻拉埋班同事去試新嘢先。喺員工介紹下，知道原來呢間係香港首家正宗地道嘅貴陽牛肉粉專門店，牛肉粉係貴陽家喻戶曉嘅美食，每碗粉萬變不離其宗，精髓在於唔同嘅湯底。我就order咗一碗紅油牛肉粉，簡單嚟講，係「湯濃粉香」，上檯時仍冒出熱氣，呢種天氣品嘗，寧舍滋味。先輕呷一口濃湯，細味下完全感受到佢哋用料好足，個湯頭辣得嚟層次好豐富同鮮明，似乎包含咗唔少香料，唔會淨係得個「辣」字，紅當當嘅辣油既刺激視覺，亦刺激味蕾，令人即時胃口大增、食指大動！至於牛肉可謂肉香四溢，未食已聞到一陣香味同鮮味，睇落肥瘦勻稱，咬落軟腍中不失嚼勁，份量亦唔少；配埋彈牙滑身米粉條同其他配菜，食完成碗真係好滿足呢！能夠做到每樣嘢都好夾，唔怪得一向鍾情雲南米線嘅同事們都紛紛轉軚投貴陽牛肉粉一票啦，當然本人都唔例外，哈哈！