火鍋本色 (已結業)

之前同朋友黎打邊爐，已經好鐘意佢哋嘅牛肉同龍蝦丸。今日同個同事黎呢頭做嘢，諗緊午餐食咩好嘅時候，見到火鍋店個阿姐係度派傳單。原來呢間嘢有午餐，就上去試下......午餐唔係食火鍋，好似車仔麵+火鍋咁，自己揀湯底，配料4款，跟餐前點同麵，盛惠$78。湯底有冬瓜湯，南瓜湯，沙爹湯同蕃茄薯仔湯。我梗係揀我嘅至愛，蕃茄薯仔湯啦！同事就揀冬瓜湯。至於配料，梗係手切肥牛啦！仲有龍蝦丸、豬頸肉，同埋芋絲。麵都係我最愛嘅稻庭烏冬。小食係酸菜同沙律，幾開胃。 配料用細鍋上，下面用火興住，麵分開上。攪下個鍋，原來下面已經有菜墊底。配料已經熟透，唔使等個鍋滾就可以食啦！ 牛肉同平時打邊爐個D一樣，好食！  龍蝦丸都係師傅手打個隻，彈牙！ 豬頸肉就不過不失。 試下湯底，蕃茄味有D淡，鐘意清淡D嘅人ok！個部長走過黎問下意見，我就話個湯可以濃D。跟著個部長即刻話唔好意思，話會同師傅講番。服務態度ok!  同事話個冬瓜湯好好味，下次等我試下先！ 總括黎講，$78 食到打邊爐牛肉，手打肉丸，已經好吸引。成個餐食完好飽，抵食！