古早味休閒台灣 (已結業)

之前試過係銅鑼灣嘅古早味，大家都贊好，所以今日黎到旺角，依然選擇番食古早味為午餐。 我揀咗古早味牛三寶湯麵($75)，配小食3款+飲品。牛三寶有牛展、牛肚、牛筋，滿足哂中意食牛嘅我，加上濃濃嘅湯底同彈牙嘅台灣麵條。小食每日由廚師推介，今日係春卷、菜、瓜，估唔到春卷都咁脆口餡多！ 於是我地額外叫咗鳳味蝦網米春卷($26)，每件都有一隻蝦，非常鮮甜，而且皮薄，唔會好膩。我地亦都追加咗小食台式醬牛肉(只係需要+$18)，牛肉薄身，帶少少麻辣，好開胃！飲品方面我點咗珍珠奶茶，依度嘅奶茶嘅茶味比較重，而且甜度適中，珍珠亦都好煙韌。最令人驚訝嘅係佢地嘅水果茶，依杯係紅石榴水果茶($33)，估唔到水果好豐富，例如有草莓、青檸、橙、火龍果、椰果等等，果味濃香，消暑解渴一流。