金鶴拉麵 (和富道) (已結業)

晏晝好肚餓又到食飯時間，本來今日想去金鶴拉麵食個雞湯拉麵，因為之前食過都好好食。但去到之後，又俾我見到原來佢有個得獎嘅鰻魚飯，最後把心一橫，都係叫個鰻魚飯食，因為之前已經食過拉麵。 其實佢除咗雞湯拉麵，仲會有啲特色拉麵，我見到期間限定嘅軟殼蟹拉麵，其實都好吸引，今次叫咗鰻魚飯唯有下次先再嚟試下啦。佢個鰻魚飯餐其實除咗一盒嘅鰻魚飯，仲會有一個芥末八爪魚嘅小食，估唔到佢呢個芥末八爪魚幾吊胃口，因為佢有少少嘅辣味，個八爪魚都爽口，應該幾新鮮。講番個主角鰻魚，食落有d炭燒嘅感覺，唔知佢其實係用電板燒定炭燒，但係幾有炭燒嘅風味。另外其實佢比一般嘅鰻魚飯貴，係因為唔係我哋平時食開嘅鰻魚平時食開嘅鰻魚通常係扁平，但係佢嗰個係比較彈口同埋好厚身好似食緊一嚿好肥好香嘅肉咁。食過咁好嘅飯，當然要咁配上日本出產嘅波子汽水啦，令到自己好似有置身於日本嘅感覺。我好希望不久嘅將來可以快啲去日本食，今次食完飯要返下次先再食下佢啲午餐，因為望落都真係幾抵食。