愛群快餐店 (已結業)

初次黎到順利邨，如果唔係去附近體育館玩攀石真係唔會係度出現。入到邨估唔到都幾多選擇，論門面，呢間愛群快餐店絕對唔算好吸引，但聽住附近朋友講佢由細食到大，而我又想快快食完過體育館，就即管試試佢。入到去，見大部分食客都應該係住係呢個邨嘅公公婆婆，同收銀姐姐都有傾有講，感覺都頗有人情味。快餐店嘅格局同鋪面一致，真係幾懷舊，枱櫈都係fix死係地下果種。先去收銀姐姐度買飛，再過bar個邊拎餐。呢晚我叫左香茅雞扒扎肉蛋飯!佢出餐都算快，仲有例湯送添~~想講個飯比我想像中吸引，塊雞扒有相你睇幾大塊，啲炸蒜同油蔥撈埋飯好食! 我諗係因為啲炸蒜都夠脆，淋左真係會想喊，所以佢呢個ok! 講真我好少食有埋扎肉呢個combination，所以再加埋煎蛋感覺幾豐富!總括黎講佢係超出左我預期嘅，快靚正! 佢將會係我每次去攀石嘅飯堂。