高麗韓國餐廳 (已結業)

今日老細牛一，猴子又再次被同事及老細脅持去食午飯。之前在公司吃的生日蛋糕仍未「落格」，隨即又要食韓國燒烤，唔通除咗唔好「空肚食早餐」之外，我哋都唔應該「空肚食午餐」？以前食韓國燒烤，食完之後成身都係油煙味，返到屋企要即刻沖涼洗衫，不過今時今日好多舖頭都會好似呢間高麗韓國餐廳咁，用新式的抽氣燒烤爐，油煙即時在烤爐兩邊的氣孔抽出，唔會搞到「成頭煙」，食起上來真係自在得多！近排豬肉出事，所以其實冇太多選擇，牛肉同鮮魷係首選，再加多一份已經煮好、唔需要自己燒的雞肉。套餐包埋菊花茶或酸梅湯，泡菜醃菜拼盤、白飯及蘿蔔湯，仲有飯後甜品。先說烤肉，牛肉尚算新鮮，醃得入味又唔太咸，鮮魷亦夠爽口彈牙，兩者都可以推薦，問題只出在雞肉身上。正如猴子剛才所講，雞肉係預先煮好，可能係放置太耐令到肉質變乾變韌，口感下降。蘿蔔湯亦同樣有煮得太耐的問題，湯水尚算清甜，但蘿蔔就有點「淋」。餐後的驚喜可說是甜品花奶啫喱，猴子感受唔到呢款啫喱有幾咁韓流，反而有種港式懷舊氣味。