大喬日本料理 (已結業)

尋日同客開會兼食lunch，佢介紹去佢响灣仔office 附近新開的【大喬日本料理】食晏，話係近期幾有水準嘅新店喎........呢間日本野好似啱啱開咗無幾耐, 裝修都仲好新,分別有鐵板燒枱、bar枱同卡位;午餐有鐵板燒、刺身、天富羅同壽司,嘩~ 個客請食開年飯，梗係要試佢最豪果個LUNCH - 海鮮鐵板燒啦!燒大蝦+三文魚+帶子+銀雪魚,仲有炒野菜,炒飯同甜品,份量好夠,食得出啲海鮮好新鮮彈牙,特別係隻大蝦,唔係啲死死實嘅雪藏貨,三文魚燒得啱啱熟,帶子好厚好彈,原隻新鮮即開,都幾"dum"本。我就最li ki 銀雪魚喇,質地好似牛油咁入口即溶,香口又有魚味,最緊要唔腥嘛!佢個餐仲有炒野菜同炒飯+麵豉湯,本來已經好飽,但佢個珍珠米炒飯粒粒都有淡淡豉油香,唔覺唔覺都食哂成碗。都好夠份量。好彩甜品係柚子雪芭,清新感覺好fresh.......呢餐真係食得超滿足,臨走仲送咗張15%折扣卡俾我地下次用,下次又有機會可以再去encore喇!