T4 清茶達人 (已結業)

灣仔不嬲都係美食聚集地，連嘢飲都唔執輸。台中茶飲店係過江龍之一，但係因為佢出名係清茶，所以未必有咁多人識佢。今日難得返一返灣仔，一於試下佢，順便買啲嘢飲探下班。佢喺譚臣道嘅一角，灣仔地鐵站行一個街口就到。因為全部嘢飲都加咗配料，所以我哋一律都嗌咗無糖，除咗水蜜桃係水果，加返少少糖吊起果香清茶茶味夠香，水蜜桃真材實料，入口清甜，果然係招牌飲品。嫩仙草奶茶同法式布丁奶大概相似，除左配料唔同。兩個都好滑，布丁夠奶香，嫩仙草有返本身嘅仙草甘味，唔會死甜。奶茶有茶香，入口甘香有餘韻，就係有啲可惜冇得揀鮮奶。繽紛百香果有珍珠同彩虹啫喱，不過有啲太甜，百香果嘅香味係遠處都聞到。不過整體都係推薦微糖到走甜，同埋佢哋係可以用自己杯㗎，盡可能就支持環保啦🤩