至尊滿屋日本料理 (已結業)

又黎食放題，今次出旺角試高人氣嘅滿屋。整體質素不錯，下面果啲重點推介。吉品鮑汁花膠盛宴，四塊花膠，勁濃味，啲汁又較得好，一般放題又無，真係幾驚喜。天婦羅入面蝦其實都唔錯，但最鐘意嘅係蟹棒天婦羅，外脆就必定啦，但咬開有汁有蟹鮮味，十分正。串燒部份燒菠蘿堅正，唔算太熱，但超多汁，感覺好新鮮。炸物方面廣島蠔夠鮮味，炸鮮蝦雲吞隻蝦幾彈牙，連埋外面超級脆皮帶出黎果個反差真係令我再叫多一隻。榴槤控就必點榴槤炸彈，一咬開勁香勁好味，榴槤正，配埋炸嘢係外圍就更係另一番享受。呢間清酒梅酒任飲，亦有唔少嘢飲揀，感覺好賺，特別一提梅酒無溝稀好多，值得一試。