車仔麵之家

營業中

休息中

經同事介紹去左試呢間車仔麵⋯中午食飯時間約十二點幾去，好多人排隊買既方式都係傳統車仔麵叫餸咁⋯但呢度令我好緊張，因為後面條隊千軍萬馬咁，車仔姐姐已經擺出一副十秒夾完一碗麵既預備姿態出黎，所以排隊時就要諗定食咩，再用急口令方式叫出餸名，到我時我真係以急口令式叫出「蘿蔔、牛腩、豬腸、甜酸齋、魷魚」，連高效率摩打手既姐姐都聽唔切，俾漏左魷魚我⋯仲有佢冇問我要唔要辣，我又唔記得叫⋯所以今日係食得異常清淡。結論係聽日要再去食多次，誓要食到魷魚同辣醬！食飽飽好滿足，甜酸齋好味！如果豬腸再清乾淨點就更好（不過我都知清洗豬腸係好花時間同手力）總而言之呢間係一間中上級數既車仔麵檔！