誰是老闆 (已結業)

呢間以為佢係一間普普通通嘅茶餐廳，原來都好多人幫襯，中午12:30去到已經坐滿晒，佢嘅午餐有好多款，每日10幾款都應該走唔甩，有中式蒸飯同炒粉麵、日式大碗飯同拉麵、鐵板扒餐、泰式冬陰公等等，花多眼亂，樣樣都好似好吸引咁。最後我揀左泰式魚餅拼香茅雞翼冬陰公米線，一上菜見到佢嚇左一嚇，成碗野又紅又橙，好驚會好辣，飲一啖湯，好正呀！佢係好香但唔太辣果種，我飲左好多湯，碗米線啲餸都好多呀，有3塊魚餅、2隻雞翼、3舊豆卜同蕃茄，魚餅同雞翼都好食，豆卜索左汁有驚喜！友人話佢啲炒粉麵好食，等我下次又試下先！