恆河咖喱餐廳 (已結業)

同男友兩個又周圍食，今次揀左呢間。其實之前在東大街都食過，發現咖喱太多，一人一個餐食唔哂，加上剩返好多咖喱汁，所以今次就兩個人一個餐，選了辣牛尾，配蒜茸烤餅，再加一份普通烤餅，餐飲轉士多啤梨乳酸。男友叫完之後去厠所，我就攞雜誌來看。好快來湯，試一口，似青豆甘荀蓉湯，幾「容」，不過我興趣不大，由男友解決。之後黎咖喱烤餅，好不錯，烤餅又熱又脆，兩大塊，香噴噴咁，沾咖喱汁食好味。加上美味的薯仔，正。咖喱除了汁有兩大件牛尾同一件薯仔，我覺得可以多點薯仔，牛尾細o的。牛尾幾林，有筋，我最鐘意，同男友一人一件剛好。後來來了蒜茸烤餅，嘩超香，有葱同蒜的香味，好鐘意。食到中段，黎左乳酸。初試有點藥味，但食多兩啖又ok，食完咖喱再飲簡直perfect，因為酸甜冰凍可以解辣。其實佢杯飲品好大杯，我同男友都唔太好飲野，兩個人一杯都嫌太大杯。唔知係咪我同男友都細食呢，我發現好多食肆我地都要share一個餐先唔會浪費食物，有時都幾唔好意思。(當然大家樂例外啦，o的野鬼咁少)埋單唔駛加一，兩個人59蚊，好抵。