洪師父牛肉麵 (已結業)

之前去開台灣都有幫襯過洪師傅，而且次次都中意買佢地嘅牛肉乾食。唔講唔知，原來洪師傅竟然喺旺角依度開左鋪，上網睇翻先知原來上年已經開左，仲要有唔同分店添。旺角依間喺大馬路，位置好易搵，今日放工就專登過黎試下。因為近排疫情關係，開放嘅位置唔係好多，好彩早少少入，如果唔係就要慢慢等。一坐底發現每張檯面都擺左支搓手液，都幾貼心。晚市有dinner set，包一杯野飲，我叫左紅燒牛肉麵配珍珠奶綠，大概$70幾蚊左右，我覺得價錢可接受。同埋野食都上得幾快，叫完無耐就有。我揀左粗麵，係我最愛嘅刀削麵，麵煮得岩岩好而且食落有口感。牛肉分量雖然唔多，不過煮得好淋，都唔錯。唯一有樣野係我覺得牛肉湯底比較淡味，唔夠突出，如果再多翻啲牛肉鮮味就會更好。成碗麵嘅分量我覺得麻麻啦，不過凍飲就好大杯。好欣賞杯奶綠唔會過甜，我覺得甜度岩岩好，唔會好似平時出面飲開嗰啲珍珠奶茶咁全部都勁甜，而且珍珠都幾Q彈，唔錯。雖然食完之後始終覺得同台灣嘅有分別，係爭左啲無咁好食，不過整體上我覺得可以黎試下啊。