烤焗工房 (已搬遷) 新店位置

為食豬行行下突然“貢”咗入一條窄巷，咁窄嘅巷都竟然有幾間小食店。為食豬揀咗呢一間嚟試，點知就好後悔。小店提供嘅選擇都唔少，為食豬就揀咗薯條配安格斯牛柳粒($30)，可以揀一款醬，為食豬就揀咗芝士醬。由圖可見牛柳粒少到可憐，唔講仲以為係肉碎，薯條份量都唔算多，事關盒底墊咗啲椰菜絲。份量令為食豬失望，點知味道亦一樣。安格斯牛柳粒得嗰幾粒仔，諗住貴精不貴多，應該ok啦，點知入口好油膩，但一啲都唔香，相信唔係牛本身嘅油脂。除咗油，仲好韌，咁細粒都有筋。薯條呢，係熱辣辣炸起，但竟然唔脆，仲好油。總括呢一間小店好馬虎，用料唔靚都不在話下，煮得仲好冇心，為食豬唔會再幫趁。環境亦唔衛生，店嘅前面放咗一個紙箱俾客人掉食完嘅蠔殼，紙盒等等，個箱滿到瀉晒店員都唔拎走，只係加多一個箱，實在好求其。