建興亞婆豆腐花

營業中

休息中

好多年前食過，印象中呢檔豆腐花係唔錯。但今次再食之後我覺得以後都唔會再食。唔知係咪轉咗手，阿婆就見唔到，但就有個女人用純正普通話叫我去自己攞碗豆腐花。碗豆腐花拎到返嚟，已經覺得形狀好奇怪係好似布甸咁，企身既，正常食到嘅豆腐花，唔應該有呢種形狀。食咗兩啖，一啲豆味都冇，而且食落好有粉感，似係啲未成形嘅布甸，落得太多石膏粉。大家可以睇下張相，正常豆腐花唔會係咁既形狀，仲要賣$16一碗，又貴又難食。賣5蚊碗都唔會想食佢，或者街市豆腐舖買嘅豆腐花可能仲好食過佢。第一次用難食嚟形容一碗豆腐花。荃灣大埔嘅豆腐花好食過佢好多。另外，係冇黃糖提供，碗豆腐花已經加咗糖水，但食落似係糖漿，係死甜嗰啲化學劑糖漿。食咗兩啖加上碗豆腐花嘅質感，已經唔想再食。唔知係咪真係轉咗手，連食豆腐花要有黃糖粉咁基本嘅嘢都冇，定阿婆覺得無論賣到幾貴整成點都一定有人會嚟食。奉勸大家，唔好見到呀婆山水豆腐花就一定覺得係好食，完全係貼錢買難受。