金海閣海鮮火鍋專門店 (已結業)

世伯於澳門建造業界人面廣，知道我將會到澳門工作，便特意約埋我食晚飯，順道將佢嘅澳門經驗傾囊相授，令我獲益良多。我地是晚在此店打邊爐係阿K嘅主意，佢話呢間金海閣係靠火鍋打響名堂。一如一般人一樣，我地叫咗鴛鴦湯底，仲有以下火鍋料：桂花蚌；肥牛肉；生蠔；竹笙肉絲卷；鱔片；鴕鳥肉；鮮蝦水餃；蟹肉墨魚滑；牡丹蝦；油麥菜打邊爐我認為最緊要就係用料一定要新鮮，正所謂不時不食；另外就係煮嘅時間，呢樣就關乎食客嘅經驗，與食肆無關。鱔未到時候，所以未夠肥美，熟咗後肉質較韌，煮耐啲會冇咁韌，肉質都仍然爽。生蠔夠大又夠肥，稍為灼一灼入口好鮮甜。鮮蝦水餃即叫即包，所以內裡雖然有蝦，但唔會話唔新鮮，我食完之後冇皮膚敏感可見一斑。值得一提嘅係呢度啲墨魚滑，咬落十分彈牙，亦有墨魚嘅香味，至於蟹味就唔係咁察覺得到，不過我都覺得呢味一定要嗌。食完嘢，身體冇出現異常徵狀，証明呢度火鍋料係新鮮嘅。一行有五個人，埋單八百幾，世伯又唔俾我找數，呢舖真係又食又拎喇！