Number Fifteen (已結業)

約食飯由我話事，帶住兩個極咀刁老友，再到number fifteen試菜。午餐包自助沙律吧同餐湯、麵包，是日任飲餐湯竟然係南瓜湯，發達喇！連氣飲咗兩大湯碗，大滿足！沙律都好新鮮，只係肚皮位置有限，點到即止。朋友唔食南瓜，點了個洋葱湯，都話唔錯，要叫去慣大酒店嘅佢點頭唔易啊！各自點主菜，咀刁老友話香草羊架好味。我就略嫌牛肉漢堡太熟，有啲鞋同實（失望得滯唔記得影相 ），食咗半份就停手，叫阿姐打包。點知阿姐搞錯咗，將佢變咗廚餘。算啦，叫咗件北海道牛奶蛋糕賀一賀生日啦，牛奶味都幾香，蛋糕軟啲仲正：最後餐茶嚟個港式奶茶，超～～濃滑，比好多大酒店同荼餐廳啲洗碗水好好多，果然用心製作，下次有大陸客過嚟一定帶佢哋上嚟，唔貴又有卡士，腦細見到張單都冇咋型啦！臨走前老闆娘送大禮:，竟然係新做咗一份牛肉漢堡補數？！！搞到我鬼咁唔好意思，我只係唔想浪費食物咋！最後都帶咗番屋企，第二朝叮熱做早餐。服務態度咁好，抵讚！