川味雞烤魚大王 (隆亨商場) (已結業)

今次嚟到大圍隆亨邨探朋友傾下下次出國旅程，經過商場後面近街市出面外圍有新開不久嘅川菜餐廳，決定試吓新嘢。店內大部分食客都係食緊火鍋/烤魚，正啊！侍應們服務態度好好，好用心講解餐牌，不時會問吓客人有無額外需要，有需要時會同幫我哋加湯。涼拌川辣味魚皮($78)~麻辣嘅麻味好夠，呢道菜喺香港比較少見，魚皮爽滑彈牙，好掛汁同好入味，另外有有花生碎、青瓜絲、芫荽、生洋蔥及芽菜等，呢個餐前小食好開胃。烤麻辣小半條鯇魚 ($268)~配料包括芽菜、腐竹、白蘿蔔、酸菜、娃娃菜等，魚皮烤到好脆，好香燒焦味，啲魚幾滑 ，好香魚鮮味👍🏻 叫咗BB辣，有豆豉、花椒及剁椒，辣味啱啱好，唔會搶過條魚本身嘅味道，不錯！香濃黑松露餃 (6隻$68)香濃黑松露味，豬肉啲餡醃得夠入味，一啲都唔鞋口，餃子皮夠薄，推介!呢度嘅飲品都唔算貴，我哋叫咗支裝涼茶，見到隔離枱大大杯特飲好似係$26，下次都可以試下。