寶時茶餐廳

營業中

休息中

今日大約11:20am去到，上咗2樓窗口位坐低，舉手示意侍應落單，一個比較年長嘅女侍應見到我舉手，但係放低咗隔離枱個餐之後就走咗去，行到去最埋邊樓下傳餐上去2樓嗰個位先至問我食乜，個距離應該至少有15尺，咁我大聲嗌嘢食，茶餐廳呢啲落單形式無所謂嘅，我嗌咗個全日早餐B沙嗲牛肉通粉，因為係遠距離落單，所以過咗一兩分鐘後我襯個女侍應行嚟我嗰邊就弱弱一聲（因為覺得有少少煩住佢咁）同佢講個沙嗲牛係要通粉，唔係麵嘅（個餐本身係跟麵），但係佢好唔耐煩躁底同我講‘咪落咗囉靚女’，然後行咗去，20分鐘後啲嘢食嚟（今日整嘢食時間較平時耐唔知係咪因為年廿八），個女侍應好大力咁將碗通粉同埋碟煎蛋放落我張枱度，之後我一路食見到佢同其他客人拍晒膊頭，唔該前唔該後，完全係雙面人。雖然我唔係熟客，但間唔時去開土瓜灣都會去寶時食嘢，因為餐廳老闆同埋一個比較年長嘅男侍應態度好好，嘢食又ok，同埋呢間係剩返好少有樓上雅座嘅地區老店茶餐廳，我覺得好值得支持，不過所謂一粒老鼠屎係會毀咗一間餐廳，我唔會再去幫襯嚕。