甜記餃子 (已搬遷) 新店位置

我係非常之鍾意食餃子嘅，閒時都會搵下有邊間餃子好食。今日就試咗呢間位於長沙灣嘅餃子店。我地兩個人試咗4款口味。一碗10隻湯餃$46，可以選1或2款口味。韭菜豬肉餃呢一款經典口味一定冇得輸，係最基本嘅餃子口味。韭菜好鮮甜，令豬肉嘅鮮味亦有所提升。成隻餃好足料，“實的的”，入口感覺特別滿足。南瓜忌廉雞肉餃呢款口味好特別，亦有驚喜，西式口味喎。入口第一感覺係南瓜好甜，有少少忌廉奶香味好得意。加埋雞肉整體味道好似西餐湯嘅味道。京蔥羊肉餃京蔥入口一定係好香，另亦減低咗羊肉嘅羶味。兩樣材料都好夾。香葉豆角豬肉餃一入口我覺得好有泰色風味，香味令到整個餃子充滿東南亞味道，但又唔會太搶。豆角好軟，唔會有渣亦唔會因為太硬而影響咗整體口感，加埋鮮味肉汁，好開胃。湯底我地選咗蕃茄薯仔湯，硬更加開胃。另外亦想讚下佢地個菜蒲，甜甜辣辣好開胃。