老街 (已搬遷) 新店位置

聖誕同跨年買咗好多嘢俾A姐，所以銀包都乾晒塘喇，其實我家A姐雖然係一名港女，但好彩唔一定要去啲豪華餐廳，經濟實惠嘅小店，佢都好滿足架。加上近期好耐未食過台灣嘢，所以今日去到旺角嘅老街，店內座位唔多，而裝修設計配以舊台灣嘅風格同相片，仲播著台灣老歌，真係好有古早味呀。不過，如果閣下追求坐得舒適，呢度就未必啱你喇！紅燒牛肉麵啡色嘅湯底，上枱已經聞到好香濃嘅牛肉味，牛肉大大件又腍又入味。湯底同牛肉就相當吸引，不過，就唔見其他常見嘅配菜，如紅蘿蔔，蘿白喇。麻辣牛筋牛腩麵A姐話天氣凍，所以要食辣嘢暖身。呢個麻辣牛筋牛腩麵，麻辣味夠晒香又唔會搶晒牛肉嘅味道！除咗牛腩，牛筋都好有咬口，相當唔錯。滷肉飯（小）除咗牛肉麵，台灣菜嘅代表又點少得肉燥飯呢，叫碗小嘅諗住試吓，原來都好大碗。A姐就嫌啲肉燥太多肥豬肉，之但係計我話，肉燥就係多肥豬肉先好味。好彩食落又唔覺好油膩，用嚟撈飯一流！小香腸拼鹽酥雞鹽酥雞係店員另一推介，一啖一粒，外層香口酥脆，鹽味胡椒味啱啱好，炸皮唔算太厚，內裡嘅雞肉又夠嫩滑。而小香腸外層煎得香脆，內裡油香十足，唔錯。