古早牛肉麵 (已結業)

古早味，本來係古老、傳統同懷舊嘅意思，但對我黎講，就係我心目中對台灣嘅感覺。行開深水埗區偶然來到呢間網上評價唔錯嘅餐廳，入面水泥工業風嘅牆身，同埋各式各樣台灣舊時代嘅招牌，勾起我去台北淡水區行古早精品店嘅回憶。店內午市套餐價錢好親民，主菜、小食同飲品選擇好多。好多小食都想試，最後點左一個主菜加兩個小食。招牌紅燒牛肉配牛骨湯麵（$60）牛骨湯味道香濃，牛肉係厚切後一字排開嚮麵上邊， 份量好多，牛筋同牛肉分佈平均，煮得好稔，有充滿膠質嘅口感。麵比較粗身同煙韌，蘿蔔亦都索曬湯嘅味道，正。宜蘭迷你蔥肉餡餅（跟餐加配+$16）我冇去過宜蘭，但覺得呢個餡餅本身做得好好食，係今餐最喜歡嘅食物。外層似煎餃子皮，裡面嘅菜肉餡係有爆汁效果，要小心食。台式小香腸（跟餐加配+$14）細細條好易入口，非常香口，有西門町山豬肉烤香腸嘅味道。茉香珍珠奶綠（$15）呢個係跟餐飲品轉台式飲品減$10後嘅價錢。味道幾清新，但個人覺得珍珠可以再煮軟少少。