古早味台灣原味 (已結業)

平日晚同朋友來食飯，好彩有book 位，閒日都好多人呀。😖 店內有bar台座位，下次都可以試下一個人來食。我哋要咗個2人養生雞湯（$98），上台嗰陣時好熱辣辣，每人都飲到3碗呀。 佢藥材味好濃，仲有成支參係入邊，加埋6-7舊好嫩滑嘅雞肉，值得一試。 台式一定會食嘅 古早味牛肉麵（$65），佢個粗麵好好食，有3大塊牛肉，煮得好淋。 個湯汁都好好飲，冇味精。另一個台式一定會食嘅係 台式滷肉飯（$58），超級多滷肉舖喺面，啲肉肥瘦啱啱好，兩個人食都覺得好大碗。飲品一人一杯，朋友要咗杯熱嘅黑糖珍珠鮮奶（$26）（左邊），我就要咗杯凍嘅黑糖珍珠奶茶（$22）（右邊）。個人覺得熱嘅好似好飲啲🙊，2杯都偏甜，好多珍珠。最後忍唔住要多個甜品，我地食咗個 檸檬愛玉（$28），佢係成塊檸檬放咗係面，下面有杞子同超級多愛玉，滑嘟嘟嘅，飽肚都仲食得落！今餐食得好飽，有參湯有麵有飯有甜品，每人大概$160左右，係值得嘅！