囍源古早蛋糕 (已結業)

好耐無寫過食評啦！今次遇到比較特別嘅古早味蛋糕都想寫吓。米妮早訂左流心芝士🧀味（其實好想試榴槤，可惜取貨當日無，話說款式日日不同，大家可以去社交平台睇有咩款）。囍源古早蛋糕係深水埗港鐵站附近，同周邊舖頭有啲格格不入，尤其出面攤檔俾人好雜亂嘅感覺，而囍源就好似別樹一格咁，別緻的骰🥰門口仲放埋蛋糕樣板，好吸引😍可惜我收工去無蛋糕出爐，感受唔到果種撲鼻嘅香味😌講返蛋糕，返屋企打開發現件蛋糕同樣板相符，呀唔係，係樣板同賣出嘅蛋糕一樣咁大件咁靚，仲要好香，本身仔仔話要扮生日切蛋糕🎂，我諗住切少少試下先，試完就忍唔住再切多啲黎食，最後到仔仔影相剩返2/3😅 蛋糕好鬆軟彈牙，濃香蛋味，芝士係好似一層醬咁夾係中間，食得出用左唔同款芝士製作，下半層有芝士味滲入，味道似日式芝士蛋糕，上半層就似原味蛋糕，一個蛋糕兩款味道，真心唔錯，但個人偏向鍾意下半層多啲😋蛋糕邊同底都無燶，無苦澀味，食過就想encore！期待下次再試其他味！