發哥粥底海鮮火鍋 (已結業)

身為沙田友，好多朋友都係住沙田，住顯徑仲特別多，經常嚟呢頭附近食嘢，最近見到顯徑冬菇亭開咗間新食肆，有小菜有火鍋，今晚一家攞開嘢過嚟，就決定入去試吓；今晚我地揀咗食粥底火鍋，見到有套餐，我地兩公婆分別點咗同龍餐蝦海蟹餐，先嚟一個燉湯，好清潤，每個餐都有安格斯牛肩肉、蟶子、貴妃蚌、黃金蜆、海蝦同多寶魚，不過當晚冇多寶魚改咗海班，仲有可以揀新鮮鮑魚或者冰鎮鮑魚，我地兩個都要新鮮鮑魚，上枱嘅時候隻鮑魚又大隻仲會郁㗎，粥底一滾我地就先食鮑魚，真係食得出嘅鮮味，所以我推薦大家嚟到一定要食新鮮鮑魚牛肩肉好嫩滑，海蝦夠鮮甜，雖然龍蝦同蟹都係半隻，但套餐仲有8款食物選擇，好多種類，所以一定夠食，除咗汽水任飲，每枱都有瓶竹蔗水，經理話係廚房師傅自己每日煲，唔係街貨，飲落果然好嘢!下次除咗粥底火鍋都可以試吓小菜，呢度三個冬菇亭都係佢地，地方大，坐得好舒服，值得同一大班朋友嚟聚餐!