老地方 (已結業)

Item: 老地方
Rating: 3
Author: 奧志雷

3.5

34 食評

味道

環境

服務

衛生

抵食

300

大埔

$50以下

港式

奧志雷

等級4

2.1K

我仲記得依度係要自己落單架，見過有食客以為侍應們唔招乎係度發爛渣﹗又見過食客以為無人理佢，招乎不周，黑口黑面走人。

琴晚預備 BBQ 醃肉醃到零晨四點先瞓，依家十二點就要落到大埔買餸喇，時間緊迫，怕唔夠時間啊！

我手字 ok 麻？都寫得好整齊又骨子，見得下人架。老地方已經轉左自助落單，即係要自己寫單交比侍應，哈哈﹗當然如果您強烈要求，侍應們都會幫您寫既。

女友仲有成個鐘先收工，想餓死我咩！唯有食住等。只係剩返細小的二人枱，點夠位放食物呀，只好坐住先，有大枱即轉，每次坐得唔舒服我都會非常暴躁呢！

兩個人食三個菜、兩個小食加一個烏冬唔係好多啫，但張枱勁細點放呀，我又火﹗黑面侍應阿姐求期掉係枱道就走左去，等我地自己諗掂去！唔係咁既服務態度麻？可惡！

馬拉盞炒通菜，炒得味道非常濃郁，但點解辣辣地既，蝦醬變左馬拉盞啦！仲要我自己寫單寫明蝦醬，咁都錯！我由細到大都唔鍾意蝦醬的，討厭過咸過嗆既味道，不過近年開始接受，可能年紀大左口味有點改變。

乾蔥頭加炸蒜蓉再加馬拉盞，味道好重好濃，不過真係好香口，撈飯應該好好味又較易接受。水通菜都鮮爽多汁，最愛水通，千其唔好比乾硬旱通我呢。不過我食菜其實係想清清地架乍﹗咪轉左師傅啊？以前清炒又得、蒜蓉又得，依家相比之下差左好多喎。

蒜蓉炒菜芯，食完重口味通菜當然要 keep 住啦。菜芯同樣調得有過之而無不及，真係實在落味太重味喇，依家晚飯時間唔係諗住我地要黎送酒掛？而且依度無酒賣呢﹗

雖則唔係話難食，係好香口惹味，炒得爽嫩多汁又唔老，鑊氣撲面而來，乾蔥頭、豉油、炸蒜，我真係寧願用普通蒜蓉加鹽已經夠好食啦。

香蒜炒金菇，試新菜。點解會係一半金菇一半芽菜架？完全無表示過係金菇炒芽菜喎，有點被騙既感覺，我不太食芽菜的。芽菜味好嗆，水份勁多，完全蓋過金菇味道，喧賓奪主。仲要炒到有點幾燶，賣相一點都不討好。

只食到豉油、芽菜腥味及燶味，我同女友都每人試左幾啖，要放棄唔食，浪費都無辦法。阿紅妹幫我收左去啦，唔想眼冤。

蜜糖炸雞翼，只不過係用大量勁希又水既蜜糖水淋面，蜜糖淡而無味，幾乎食唔到。有別於其他食肆用薄薄一層蜜糖平均地、黏黏的包住整隻雞翼。好普通又炸到乾爭爭既雞中翼，no good ﹗

細去骨白雲鳳爪大辣，味道只可以話係甜酸鳳爪乍，甜味強烈，十足泰式雞醬囉。辣都唔辣下，只不過係微微微辣，酸度又唔夠，溫度又唔夠凍，質感滿意既，夠爽脆彈彈的甜鳳爪，都好味過上次少少啦。

麻辣滑牛火鍋烏冬，次次都食冬陰功，有點悶！咖喱又取消左，唯有試試麻辣，我地已有必死既覺悟，有心理準備會麻麻地，無期望既平常心。

麻辣滑牛火鍋烏冬，新嘗試總有點戰戰兢兢，雖然一早做好心理準備啫。飲啖湯底味道一般，不香不辣不麻，帶點微微微辣夾雜點點香料味道，一次無妨，都係冬陰功或咖哩最好味﹗

白蘿蔔、豆腐、芋絲、鮮菇、豆腐卜、龍蝦丸、滑牛、唐生菜、金菇、烏冬，其實我覺得健康又抵食架﹗仲有喇沙湯底未試，女友話以後試新野唔好預佢，好！咁您食自己啦！

普通平價即食烏冬，所以要好留意烚既時間，太耐會溶到變麵粉架﹗雖然平價烏冬但都可以煮得好味架，質感滑溜有咬口，索左微量麻辣湯，都滿意。不過麻辣湯底太淡，要加蒜香豉油先得，即係剛才炒菜芯剩返既汁囉，即時惹味又好食百倍呀！

太陽蛋炸雞扒出前一丁，太陽蛋加豉油？幾新奇喎，哈哈，多謝。賣相整齊有調理，美觀吸引有 heart，讚。有豉油同生菜送埋，生菜爽嫩充滿水份，咬到索索聲，帶埋湯汁食，美味。

炸雞扒跟小食併盤既炸雞扒一模一樣，好咸喎！炸到乾硬鞋呢，有隔夜翻炸之厭。麵就煮得好好，爽夾滑又熱辣辣，掛起甜湯倒落肚，正！