池記 (已結業)

今日放假，去開九龍灣行街，响德福廣場看看有乜食肆，最後決定去池記食午餐。店內環境擠迫，座位之間又窄，坐得唔係太舒服。服務方面，店員雖然忙碌，但有禮貌，這點令人滿意。可惜味道方面，只屬一般，用來填飽個肚絕對冇問題，但要再次幫襯，就要諗諗。今次叫了蟹粥同兩個午市套餐，套餐揀了飯同小食,另加$3可選豆漿或薏米水。吉列豬扒菜飯配咖哩汁，豬扒炸得外脆內軟，又唔油，咖哩汁有少少辣,味道一般,菜飯味道剛好，唔會過鹹。炸鯪魚球唔係太好食，炸過了火，外皮又乾又韌，鯪魚肉唔彈牙，而且調味太鹹。金衣蟹皇粥，粥底綿又唔鹹，可惜隻蟹全沒有鮮味，蟹肉還有少少霉，加了鹹蛋黃扮蟹膏，感覺有少少取巧，價錢要$58一小碗，我覺得以這個質素來計，唔係太值。五寶湯飯，有雲吞、冬菇、蝦球各兩隻，菜肉雲吞、水餃各一隻,一大碗看來好豐富，其實味道一般，最唔滿意雲吞同水餃，餡料唔係太新鮮，反而冬菇厚身又好味。湯底唔知係咪加了味精,食完好口喝.南瓜炸蝦卷，香脆唔油膩，可惜南瓜唔清甜，蝦肉有雪味。成餐飯最大驚喜係杯薏米水，味道唔會過甜，有陣陣嘅薑味，薏米多，又濃郁，好好飲。