吉豚屋吉列豬扒專門店 (已結業)

一向只賣炸豬扒等炸物嘅吉豚屋，好似推出咗新菜式，行過見唔係咁多人等位，於是攞個籌等位。等咗十分鐘入去入坐底，點咗鐡板生姜汁豬扒定食，吉列豬柳泡菜鍋烏冬定食，由於兩個定食都係熱氣嘢，順帶order兩杯跟餐清熱推介熱菊花蜜特飲。菊花蜜特飲浮住一朵菊花，我呷了一啖，唉﹗伏已中，今次真係大整蠱，竟然係柑桔檸檬味（我對柑桔有抗拒），呢杯所謂菊花蜜，我跟本諗唔到同菊花扯上什麼關係，除咗浮面嗰朵菊花外，完全冇菊花味，似乎求其將柑桔檸檬蜜加朵菊花，就當作多款飲品濫竽充數；既然係咁，點解唔乾脆取名做柑桔檸檬菊花蜜呢?!至少畀人感覺抵飲尐；為咗唔好浪費，結果我女女要挨義氣哽埋我嗰杯菊花蜜特飲。我明白呢尐純粹個人喜好問題，事實上係貨不對辦嘛，餐廳方面係咪應該要有明確嘅商品說明呢﹗鐡板生姜汁豬扒定食，配椰菜絲同豚肉湯，豬扒上面仲有一pat日式沙律醬，豚肉湯好足料，味噌湯底加有好多蔬菜同豚肉，味噌湯滲有肉香加上紅蘿蔔嘅甜味，味道層次豐富，可惜唔夠熱，扣晒分；姜汁豬扒肉質好焾好滑，日式沙律醬配椰菜絲係perfect match，配姜汁豬扒就。。。，可能鐡板關係，沙律醬焮到熱晒，食落有尐失真，如果碟上效果會好尐。