粥粉麵飯 (已易手) 新餐廳

小公主歲半開始，差不多每年夏天都會帶她去淺水灣嬉水，今天星期六就是今年的第一天下水禮。之前兩年每一次都是先醫肚才游水，今年嘗試將程序掉轉，游完水才食晏，揀「粥粉麵飯」純粹因為最接近更衣室，以及之前兩年未幫襯過。其中一幅牆全部鑲上鏡子，鏡面又鍍上金銀二色中國毛筆字體，望落去就似六七十年代時候，當年非常流行、恭賀港式冰室開張誌慶的牌扁。對面一幅牆則掛上了一塊塊大小一致的綠色膠牌，上面全是菜式名字，還要是人手書寫的白色毛筆字。如果單單睇文字，一定覺得設計非常老土；但配搭了簡約餐枱餐椅、鮮明的淺寶藍色沙發及員工制服、再加上全開放式餐廳門面設計，餐廳裝修霎時變成簡約、時尚、舒適。當然還有最重要的一個原因，就是餐廳全開放式門面對正淺水灣行人專區，再前面就已經是淺水灣沙灘；加上是日天朗氣清、藍色的天空只有一絲絲白色的雲霧，還可以遠眺南中國海，如此靚絕美景，即時提升餐廳級數。餐牌雖然有點簡陋、而且又細細本，但選擇也相當多；叫得「粥粉麵飯」，當然有齊粥粉麵飯，甚至廣東小炒及港式燒味也有得選擇，只不過定價相當進取。小炒及港式炒粉麵價錢還算可以接受，燒味飯、粥品、雲吞湯粉麵的定價偏高，甚至貴過市區一些出名的