音樂人家 (已結業)

之前有朋友係度包場，覺得幾好，今次特別來試試晚飯如何。個晚客人唔多，得幾檯都唔夠十個人。最特別係有人唱歌，唱的係經典中英文歌，唔會太大聲，夠晒浪漫啦，的人都好靜咁食飯。而家一般餐廳都好嘈，可以靜靜地食餐飯都係一種好享受。兩個人各點左個中式套餐（西式套餐係焗飯意粉類太普通啦）一個三杯雞同埋個咕嚕班球，連湯連飲品，飲品有花茶同一般啡茶個類，我地叫左兩種唔同花茶，每種用個壺載住重可以加水，幾得意。湯只有中湯沒選擇，兩碟小菜份量都夠，味道都算ok，樓上cafe不會有太高要求。服務人員唔多，不過服務態度幾好，起碼唔會見到成班伙記係度吹水。埋單每位連加一唔使一百蚊，本來都幾貴，不過有歌星唱歌，有咁靜局環境，咁就唔算貴啦，太平就會變雜左，都係咁樣好。只係生意咁淡靜好難賺錢，朋友話依度成日都包場，所以影響左平時生意，佢黎幫襯要先訂位，如果唔係就分分鐘撞正包場。真係另類地方。