喫麵 (K11 MUSEA) (已搬遷) 新店位置

今日聖誕節，基本上周圍都好多人，黎過咁多次K11，都未試過泊車要等，今日竟然係兜圈兜左幾個字先有位，可想而知有幾多人，行過幾間想食既餐廳都好多人，咁岩見到係MOMA隔離呢間喫麵有吉位，就拿拿臨入去啦，基本上呢間野都係自助形式，搵位自己搵，野食可以用QR code或者係部機度自己揀，都算OK方便既。咁我叫左吉隆坡傳統蝦麵，九龍蕃茄濃湯和牛湯粉，上海柑桔檸檬綠茶，京都巨峰提子梳打，我唔知點解樣樣野食都有個地方名啦，不過應該無乜關係。D野飲無乜特別，正正常常，不過不失，至少唔會太淡先。至於個蝦麵，就真係有驚喜，一放上枱，已經聞到濃烈既蝦湯味，咁即刻飲下個湯底先，正，好夠蝦味，之後再滲出黑椒既辣味，唔錯，不過份量細左D，但味道真係唔差。至於個濃湯和牛湯粉，個蕃茄味係濃既，但我覺得係正常發揮，無個蝦麵咁驚喜。因為無set 叫，所以都唔算平，但係K11入面，應該都唔算貴既。