地道館車仔麵 (已結業)

尋日平平哋去食車仔麵。因為好耐無食過。35蚊三個餸都好好ok。係張紙畫好俾佢哋就得啦。兩個人食既策略就係叫唔同餸，換來食d咁就試到好多嘢。朋友既係陳皮魚蛋、蝦條、時菜，要咗油麵，麻辣汁。麻辣汁其實無咩麻辣感覺，就係得個辣字，不過d生菜吸晒d麻辣汁，又辣又好味。陳皮魚蛋有陳皮味，但唔濃，魚蛋細細粒，但彈牙。蝦條入面有餡料又香口都好味架。我叫既係魚皮餃、墨魚丸、魚片頭。都係要咗油麵，但要秘製汁(辣)。秘製汁係勁勁勁辣，同麻辣汁既分別就是超級辣同辣！原本無叫嘢飲，但真係辣到講唔到嘢，迫住要叫嘢飲。而且d油麵都吸晒d辣汁，每一條都好辣！食得辣既都要三思先好叫呀。墨魚丸唔多得，腍既，一d都唔彈牙，好彩仲有墨魚味。魚片頭外面炸到金黃好香口，不過就無魚鮮味。魚皮餃雖然細隻咗少少，但皮薄餡靚。咬落有口感。