Hello Kitty 中菜軒 (已結業)

前幾日同幾位舊同事飯聚，之前出親嚟食都唔係放題打邊爐就係燒燒燒，中菜就真係未試過，幾位大唔透揀咗Hello Kitty中菜廳。餐廳裝潢非常中國風，到處都係Hello Kitty，當然餐具、茶壺都係，我地就梗係瘋狂影相mode啦。【Hello Kitty 干炒牛河】- 都炒得幾香口，牛肉都唔少，份量都足，同事話啲蛋絲係Hello Kitty蝴蝶結，我就唔係好睇得出啦……【Hello Kitty 點心】- 叫咗腸仔卷、流沙飽、鮮蝦餃皇、馬拉糕、菜苗餃。全部都cute到相機食先而人就唔捨得食，至於味道就不過不失啦。【牛肉石鍋飯】- 外觀同餐牌不符(餐牌個米餅係覆蓋晒成個鍋)，味道還可以，夠晒熱。【Hello Kitty 啫啫雞煲】- 煮出嚟好香，雞肉嫩滑，不錯。【Hello Kitty 爆炸飯】- 側邊嗰啲係爆炸糖嚟，真係未試過爆炸糖撈飯食。我地6個人，除左上面嗰啲仲叫咗豆腐雞軟骨、手工脆皮牛展、椒鹽鮮魷、杏汁白肺湯，連埋加一茶位前菜，食到飽晒，每人都係200幾，唔算太貴，而且整體嚟講食物質素都ok，最緊要係食得開心。