泰燒遙 (已結業)

大大隻生蝦，厚肉得嚟又夠彈牙，加埋惹味泰式辣醬，融合咗魚露、辣椒、青檸、蒜蓉⋯⋯一次過體驗哂甜酸辣香，正！蟶子皇名副其實好大隻，夠哂肉厚彈牙，連埋酸酸辣辣嘅泰式調味一齊擺落口，最先刺激到味覺嘅就肯定係惹味濃郁嘅調味，但最令人意想不過嘅係，濃味過後，竟然仲有鮮甜嘅汁液嚮蟶子肉裡頭滲出，為呢場盛宴帶來一場完美嘅謝幕～呢道爆炸豬手嘅製作過程原來都幾繁複，要先用泰式滷水醃過夜，然後再吊起風乾，最後先拎去焗炸，以達到皮脆肉嫩嘅效果。佢嘅皮脆到就好似炸豬肉乾咁，乾身脆口，但一啲都唔硬，食落就好似爆炸糖咁，脆卜卜，就算連埋皮下脂肪一齊食，都唔會覺得油膩，相反就好似食緊啫哩咁，帶少少煙韌嘅口感。而肉身就好鬆軟，基本上已經煮到離哂骨，所以好輕鬆就可以將肉同骨分開，食起上嚟，一啲都唔狼狽。另外，碟上面嘅醬汁，就係嚮泰國菜中好常見嘅馬沙文咖喱，佢唔同於一般嘅咖哩，因為馬沙文咖喱一啲都唔辣，味道偏甜，而且仲好香椰子味。