蔡潤記 (已結業)

喺十年前, 有人帶我第一次去呢間麵店, 無諗過自己喺大埔住咁耐, 自認對大埔嘅店舖都有一定嘅熟識, 竟然唔知有呢間麵店。我抱住好奇, 睇吓有咩特別, 點解個朋友要渣車嚟食? 睇落係一間平平無奇嘅舊式食店, 無裝修唔在講, 枱櫈就同大排檔一樣, 但每日有限時間做生意, 並非你隨時可食到, 我唔知道佢幾點開門, 只知道做到上午十一點幾就開始落半閘, 此時亦表示部份食物已沽清, 就好似麥兜咁, 叫河粉無河粉。如果十二點後嚟到隨時碰門釘。真係可遇可求。我只知道佢啲魚蛋超好食, 好彈牙, 以前每次我都係叫魚蛋粉, 仲有一小碟辣椒油, 又香又辣, 將魚蛋沾少少辣椒油食, 簡直係very good!我已經事隔多年都無嚟光顧, 難得今日有緣與知音者一同品嚐, 一於嚟個喪食, 睇吓水準有無變先! 朋友叫咗牛筋河加底及淨魚蛋, 我叫咗碗牛腩河, 我哋將食物Share試吓, hm....樣樣都好好味, 腩汁嘅味道真係好濃好正, 不過朋友話個湯多油咗啲喎! 食物水準依然Keep到噃!p.s. 看見上面寫營業時間至4:00, 以前只會營業至中午, 現在可能已改變了。