茶木‧台式休閒餐廳 (已結業)

幾個女同事今日終於唔帶飯，我提議去加拿分道間茶木食晏，之前食過，佢個套餐係跟杯特飲，$63要收加一，不過淨係杯特飲都值回票價。而且環境唔錯，座位寬敞，坐得舒服，啱晒幾個女人吹水！好快就入座啦，唔使點等位，諗下食咩先。最後決定叫三個餐三個人share，包括薑蔥油嫩鴨、燻海鱸魚同埋醬燒嫩肉排。主食的菜式非常地道的，偏甜嘅口味，最好味係燻海鱸魚，外皮脆脆的，甜甜的，非常開胃。薑蔥柔嫩鴨既肉質好「梅」，味道偏淡 ，不值得推介。醬燒嫩肉排醬汁甜甜的，味道似叉燒醬，好味道。飯麵方面我揀咗地瓜新竹米粉。新竹米粉幼身，份量好多，索晒啲湯，好入味，地瓜都好甜。同事揀咗牛肉麵，湯底濃郁，牛肉嫩滑，不過份量好細，食幾啖就食晒啦。另一個同事揀咗肉燥飯，細細碗，同事話好味，不過就唔太夠飽。前菜有滷水蛋、炸花枝丸同埋麻油芽菜。我既特飲係凍意大利咖啡，上面有個雪糕球，賣相都幾靚，咖啡都好香濃，不會太甜。