養心殿台式養生鍋 (已結業)

有人話星期三特別難捱，經過兩日煩重嘅工作，去到卡住喺中間嘅星期三，仲有兩日先到weekend，好難捱。為咗令星期三無咁難捱，我哋兩個決定嚟一個「味覺出走」，選咗主打台式火鍋嘅將軍澳養心殿台式養生鍋，邊聽周杰倫嘅歌，邊食台式麻辣火鍋，特別有Feel！麻辣鍋我哋揀咗台式麻辣鍋，刺激一下味蕾。麻辣鍋有多種藥材同香料，一打開嗰蓋就有陣陣辣椒麻香。最正係鍋入面有鴨血同凍豆腐，鴨血細嫩爽滑，凍豆腐就吸晒湯底嘅精華，非常入味。大家嫌鴨血唔夠，唔洗擔心，麻辣鍋底仲奉送鴨血一份，包保你食個夠！手工丸類拼盤呢個手工丸類拼盤啱晒我哋呢啲貪心嘅人，一次試晒六款手工丸，包括：鵝肝墨魚丸、墨魚丸、蝦丸、梅菜豬肉丸、芝士牛肉丸同黑松露蝦丸！全部都係人手自家製，入口爽口彈牙。A姐至愛黑松露蝦丸，黑松露味香濃，同蝦丸好夾；而我就鍾意梅菜豬肉丸，口感豐富，梅菜吊起豬肉鮮味，正！御選梅花豬油脂分佈適中，肉質鮮嫩，豬味香濃，同麻辣鍋底好夾。黑栢葉薄薄一塊，煮十秒就啱啱好，爽口彈牙！雜錦蔬菜盤呢個蔬菜盤份量豐富，有粟米、秋葵、菇類同蔬菜，全部都係非常新鮮，清脆爽口。