犇之食堂 (已結業)

之前已經經過過呢間餐廳好多次，覺得裝修好靚，一路都想去試，最近有同事食咗之後話好食，就立即令我有動力今次係港島區睇戲之前去試下。無論餐廳外面同入面都見到好多用木做既裝修同傢俱，好有森系風格。食物價錢以開係銅鑼灣鬧市中既靚餐廳嚟講都算好平，成個menu最貴既一個菜式係$86，但其他都無點去到呢個價位。見呢度居然有得單叫牛肉湯($48)，就叫咗嗰嚟試下，湯都幾大碗，入面有菜有蘿蔔，仲有四塊牛，個湯都好濃味。朋友叫咗個酢醬麵($48)，個麵係粗身個隻台灣麵，酢醬味道都幾濃烈，而且醬都好多，份量又好大碗。額外一提，朋友見到有酸菜加，話啲酸菜咁樣配搭好正，而佢地既酸菜都好好食。我就叫咗個犇之滷肉飯($38)，醬料好足，個醬可以令每粒飯都好好食好濃味。朋友再叫咗個鹽酥雞($48)做小食，每舊雞都幾大隻，又都係啱啱煮熱好整出嚟，好香～～再叫多個肉燥青菜($38)朋友叫既香芋奶綠($32)，朋友俾咗啖我試，真係好好飲，唔甜又好濃芋香味。我叫既起司奶蓋苿莉花茶($32)，個奶蓋好厚，但係都可以同時飲到茶連奶蓋，成杯都好好飲