古早牛肉麵 (已結業)

小店環境都幾乾淨企理，凳下面仲有置物籃可以放手袋，都幾貼心，入舖頭之前量體溫嘅都有做足，落完單食物好快就到。甘梅地瓜條$25岩岩炸起嘅地瓜好酥脆，地瓜嘅質素唔錯,份量都唔少，地瓜本身甜味已經好足夠，炸漿都幾薄，唔會攤涷左之後硬到咬唔到，配埋梅粉食減低左油膩感，酸酸甜甜好開胃。招牌紅燒牛肉湯麵$59估唔到牛肉居然用左少見嘅牛展，食落一啲都唔韌，份量都唔少。牛筋煮到超級軟腍，吸囇啲湯好入味。，蘿白好清甜，食落又無渣，可惜只係得幾舊。麵質值得一讚，粗麵掛湯得黎又無煮過時，仍然保留到麵嘅筋道。湯底唔係行清淡路線，食落都幾濃味，有淡淡嘅藥材香。如果想食辣枱面都有辣椒醬提供，不過我同友人唔食辣就冇試到了。鹽酥雞扒肉燥乾拌麵$58拌麵都係同一種麵，食落一樣甘彈牙，調味比較清淡，拌埋青瓜絲同肉燥食幾清爽。想食濃味啲嘅可以食牛肉麵，鐘意清淡嘅可以食拌麵，岩囇唔同口味嘅朋友一起食飯。臨走嗰陣大頭蝦嘅我地居然漏低左把傘，好彩店員叫住我地。整體黎講服務幾好，價錢唔貴，性價比唔錯。