古早味台灣原味 (已結業)

今年都未有時間去台灣旅行，又掛住台灣既味道，今日特登搵台灣野食下先得。黎到古早味，好，坐底睇下有咩好食先。麻辣豬耳，豬耳好爽脆，有少少麻辣味，因為有別於四川麻辣，台灣唔會過辣，啱香港人口味。古早味牛肉麵，刀削麵爽口彈牙，亦到沾到湯底既味，牛𦟌厚肉有咬勁，食落仲好有牛肉味添！黑糖薑母雞翼， 呢個好特別，除左雞翼外皮炸得酥脆之外，個黑糖薑母汁係靈魂，個感覺好似飲緊黑糖薑母茶咁樣，甜度辣度啱啱好，正！黑糖珍珠鮮奶，簡直係黑糖控，平時岀面飲既黑糖珍奶一定係凍既，呢度有熱既，一定要試。呢度既熱飲係爆熱，可能同隻杯有關，個熱度保持好長時間，其實識飲一定飲熱，因為凍飲會降低味蕾感覺，而且冰塊溝淡左個味道。呢杯熱飲冇令我失望，好香好滑既奶，而又飲到黑糖既香甜，而且個鮮奶放左一陣係會起皮，証明唔係奶精，超超超好飲，不過珍珠就軟左少少，少左份咬勁！