煮你隻蜆 (已搬遷) 新店位置

今日去到葵芳探朋友，探完朋友之後呢就搵嘢食啦，去咗葵涌廣場，重拾掃街嘅味道 ，上網睇下有咩新舖頭開咗，就彈咗呢間出嚟，仲講到話葵涌必食㖭，有冇咁誇張呀，於是乎就跟住個名同埋個門牌去搵呢間舖頭，搵極都搵唔到，行咗幾個圈終於搵到啦，原來佢唔係一間餐廳，佢只係一間外賣店，而且門面仲要好細間，咁辛苦搵到一於試下佢 ，佢有幾款蜆湯嘅，例如香茜、蕃茄、白酒等等唔同味道，強調係台灣夜市嘅口味，我揀咗一個爆蒜蜆湯 ，加咗粉絲同埋金菇，都幾大碗，幾飽肚，不過蒜茸就冇想像中咁多，蒜味唔係好夠，但係個湯飲落都幾清甜，以掃街嚟角度講都算 OK 嘅。