焼肉スマイル (燒肉smile)

喺香港未有時間去旅行住，梗係要食返其他地方嘅嘢食止下癮。呢間燒肉餐廳喺台灣極具人氣。餐廳近年就喺旺角開咗燒肉、鍋物等系列，今日就黎試下燒肉。餐廳環境新淨，空間感十足。枱與枱之間唔會太逼夾。餐廳平日午市，正餐都係100多啲左右，價錢非常合理同埋相宜。當日就揀咗Smile盛盒套餐同埋海鮮盛盒套餐，加$25任食生菜及韓式小菜自助吧，非常豐富。Smile盛盒包括左大大隻嘅蝦，最驚喜嘅係有北寄貝，燒北寄貝都係第一次，同埋有唔同嘅肉嘅部位。一次過滿足晒想食唔同肉類嘅慾望。海鮮同肉嘅份量十分適中，配上唔同嘅醬料，非常滋味。海鮮盛盒除咗有唔同海鮮，包括魚，蝦，同埋北寄貝之外，亦都有肉類，所以份量都十分夠，大大食嘅我都非常之飽。飲品方面，餐廳都有唔同嘅選擇。當日就揀咗冬瓜檸檬，清甜解渴，配搭燒肉非常一流。最後加埋個甜品，點咗個烤布蕾，表面燒得焦糖香脆，完結滿足嘅一餐。