Ember (已結業)

嚟呢間本身想食威靈頓牛柳，點知賣哂食唔到。但其他嘢都睇落唔錯，照叫咗兩個set dinner：先有一個大蒜薯仔忌廉湯，不過食唔到好重蒜味，女朋友唔食蒜都飲到，薯仔味就好夠又唔太膩，份量岩岩好，個餐包細細個都幾好食。前菜分別叫咗鮮青口意大利粉配藍芝士忌廉汁，同北海道帶子刺身薄切配黃金意大利飯（好似冇乜試過前菜有咁多澱粉質食）。個忌廉汁好香，以為有芝士會好濃味但又唔算，青口都算幾新鮮。帶子刺身同意大利飯呢個組合都幾特別，黃金應該係指有粟米。主菜分別叫咗鹹蛋黃蝦龍蝦尾配龍蝦汁扁意粉，同埋烤美國熟成肉眼扒。個龍蝦意粉有鹹蛋黃個味幾有層次，龍蝦肉都爽甜。牛扒佢一上碟嗰時疊住咗啲配菜，原來仲有薯仔同菠菜車厘茄，仲有黃芥末同黑椒汁點，煎得幾靚幾juicy。另外再叫咗兩杯cocktail：一杯mojito，清新消暑，飲完涼浸浸；一杯old fashioned，酒香好夠，又帶有焦糖嘅甜味，細細杯都夠回味。兩個set加嘢飲加一，九百幾蚊，算中高檔餐廳，有興趣可以一試。