吃什麼 (已結業)

平日夜晚去唔使排隊，不過都算多人食，有七、八成滿。之前「請坐」嘅時候已經想試，由台灣人主理，地道嘅台灣味，加上咁耐冇得去旅行，要食返啲台灣原味道止止癮。火雞肉飯香港嘅台灣餐廳比較少提供嘅菜式，味道較清淡，如果多啲醬汁會好啲，酸菜亦都加咗唔少分，豐富咗成碗飯。飯粒尚算乾身，火雞肉嘅纖維較一般雞肉明顯，因此相對有咬口。外省牛肉麵(半筋半肉)湯底味道濃郁，入口舒服。非常足料，牛筋同牛肉都非常入味軟稔，麵體較為粗身，容易掛湯，口感煙韌。鹽酥雞正常鹽酥雞，因為鹽酥雞比較大粒，如果炸透啲會再香口啲，調味上都好夠鹹同充滿胡椒味。花枝蝦排非常好食，蝦膠入面有一粒粒花枝，口感層次豐富，炸得十分香口，好快就清盤。臘肉炒龍鬚菜香港人比較陌生嘅蔬菜，食落有啲似枸杞菜，清淡爽口，配濃味嘅臘肉，濃淡相宜。