吉野家 (已結業)

對於住馬鞍山嘅我，想搵間連鎖美食都冇 。既然最近，吉野家喺馬鞍山開新分店 令到我又想再食吉野家。今日下晝喺公司樓下嘅吉野家食下午茶，坐喺度食嘅人唔太多，好多人都嗌外賣拎走，因為貪佢夠平又好食，好多人喺五點半鐘左右買，當晚餐食又可以慳番廿幾三十蚊。喺銅鑼灣食嘢真係唔平，開口埋口都60蚊70蚊，好啲嘅更加係百幾蚊，而家用30蚊嘅價錢就可以食到ok質素嘅日本嘢，吉野家都算係咁啦。和風牛肉飯（細），吉野家最好就係可以不斷加牛汁，用牛汁撈飯真係超級正。有時有口牛肉絲、牛肉碎嗰陣醬油香味撈飯真係一流，唔變肥仔都唔得啦！我同事lunch食得太多嘢，所以下午茶叫咗和風牛肉公仔麵。佢哋一定係用出前一丁 ，好多茶餐廳叫出前一丁都要加兩蚊至五蚊，甚至乎十蚊都見過。不過吉野家貴為大集團當然係唔使加啦。而鮮製凍檸檬茶都係加三蚊就有啦，兩個餐70蚊有找，今次我請咗同事食，其實都好平啫。下次等我馬鞍山分店冇咁多人，真係要晚晚去打躉，食下一人頹火鍋。