醉鮮 (已結業)

冰火牛柏葉真係必食首選，雖然佢係冷盤，但佢嘅醬汁係食完會上癮，食到你停唔到口，一嚿接一嚿。佢嘅醬汁味道有些少似細個喺啲街邊檔拮魚蛋啲醬，少少甜同鹹得嚟又辣辣地，非常惹味，送酒係絕配。牛柏葉夠爽，食落冇腥味，如果有叫白飯真係會拎埋啲醬去撈飯食！炒米粉本身係無咩期待，因為平時周街都有得食。但係第一啖食落去，發覺米粉個質地係煙韌有咬口，唔係嗰啲一咬就爛嘅米粉。而且非常之夠鑊氣，味道拿捏好好，食到米粉味得嚟又唔會太鹹/淡。平時食炒米粉都會落下甜醬，辣醬嚟吊下味。但呢碟炒米粉基本上啖啖米粉都已經好好味，重有啲炸豬油，蝦仁，魷魚等配料，一定俾滿分，必定Encore!!! 老干媽豬頸肉炒椰菜花，最緊要一定係試咗椰菜花先。一咬落去，質感爽口，非常掛汁同入味。真係有種魔力令你會夾完一棵再一棵，差啲都唔記得食個豬頸肉。豬頸肉就正常發揮，無咩特別所以都唔多講。總括而言，呢間係非常值得推薦同嘗試嘅大排檔/小菜館。入面好熱鬧，老細真係好好招呼，同埋成夜媽媽成1點鐘都願意做我哋生意，加上難得大廚重煮得一手好嘢食，真係執到寶。