三和茶餐廳

營業中

休息中

早排行完獅子山落到去樂富，驚覺又係另一個黃店沙漠🥺，喺冇咩選擇之下，最後揀咗三和茶餐廳。呢間究竟係真黃定偽黃，其實一直有爭議，有人話老闆娘係政協，所以傘運時呢間係藍店，不過更加多人指出而家係由佢個好黃嘅仔打骰，所以已經轉做黃店。想食下午茶，拎張 menu 一看，全部都係好大路嘅食物，提唔起興趣，最後喺右下角見到一格寫住 “部隊鍋芝士辛辣麵”，總算有啲特別，於是二話不說就叫咗呢個。一上枱，真心笑咗出嚟：咪就係一碗辛辣麵，上面有香腸，火腿，午餐肉，太陽蛋同埋一塊芝士咁囉🤣，根本同部隊鍋扯唔上任何關係。不過咁，都要講句公道說話，其實呢碗嘢唔算差，起碼腸仔煎得夠香，個麵煮得算彈牙，太陽蛋又幾靚仔，唯一係塊芝士，如果稍為整熱佢，溶溶哋，應該會好好多。